Iománaíocht, Camógaíocht agus Peil.

I 1984 nuair a bunaíodh Gaelscoil Osraí, seachas múineadh trí Ghaeilge agus an teanga a neartú b’é ceann de na cuspóirí ná na cluichí Gaelacha a chothú. Níorbh fhéidir tosnú leis an aidhm seo go raibh na daltaí fásta go leor chun na cluichí a láimhseáil agus na scileanna a fhoghlaim. Níor deineadh aon ró-mhoill. Cé nach raibh aon Rang V nó VI sa scoil ag an am cuireadh foireann chamógaíochta isteach sa sraith na bliana 1989. Tharla sé go raibh sraith iomána ar siúl do dhaltaí an tríú ranga i scoileanna na cathrach agus cé gur ghairid an tréimhse a bhí chun traenáil chuige, cuireadh foireann isteach d’fhonn taithí ar chluichí a chur ar fáil dóibh. Roimh an Samhradh tugadh na cailíní agus na buachaillí ar chuairteanna go dtí scoileanna faoin dtuath chun an tsuim a bhí spreagtha iontu a choimead beo bríomhar. Ag tús na scoilbliana 1989/90 ghlacamar páirt i ngach sraith a d’eagraigh Cumann na mBunscoileanna. Ba mhinic a deineadh slad orainn ach diadh ar ndiadh tháinig feabhas orainn. I 1993 bhuaigh Rang II Sraith Iomána idir Ranga na Cathrach. B’shin an chéad chorn a tháinig go dtí an Ghaelscoil agus bhí ceilliúradh mór dá bharr.

I 1996 bhuaigh an Ghaelscoil comórtaisí Rang V agus Rang II i gcoinne scoileanna móra na cathrach.

B’í 1997 an bhliain ba stairiúla, go dtí seo a bhí ag Gaelscoil Osraí. B’shin an bhliain a bhuaigh an scoil comórtas uile chontae son chéad uair. Bhuaigh na cailíní an comórtas 7 an taoibh agus d’imir triúr acu i bPáirc an Chrócaigh i rith an tSamhraidh..

Bhí an bua ag na buachaillí i Roinn D don chéad uair. Bhain Rang III an corn amach i gcomórtas na cathrach

Ina theannta sin roghnaíodh buachaill, Cian de Bhaldraithe, ar fhoireann Chill Chainnigh chun iomáint / comanachd a imirt san Albain

Chuir Gaelscoil Osraí críoch iontach leis an fichiú aois nuair a bhuamar Craobh na Cathrach fé dhíon. B’í an Ghaelscoil na chéad buaiteoirí agus ba mhór an onóir í don scoil.